على مدار 13 سنة تحملنا كسوريين الكثير من التصنيفات على جهات بسبب وقوفنا ضد جهات تعاديها. منعونا من أن نكون ضد داعش والنصرة وضد الأسد بنفس الوقت، لازم نتصنف على جهة. أنت ضد الأسد فبالتأكيد بتنحسب على أحد الجهات.

منعونا من أنه نكون ضد الأسد وما لنا عملاء لدول تعادي الأسد، أنه نكون ضد الأسد وما لنا مع الاحتلال التركي للشمال السوري، أن نكون ضد الأسد مو لأن طائفيين…… بس هي كتير علينا أنه ما حدا يفهم علينا أنه نحن ضد حزب الله وضد اجرام نتنياهو بنفس الوقت، ومع حق الفلسطينين بإقامة دولتهم والدفاع عن أرضهم، ومع حق اللبنانيين باتخاذ قرارهم بأيدهم، ومع كل مهجر طلع من بيته ظلم من كل هالأطراف….. كتير متعب نبقى نشرح للناس سنين، مزعج جدا حقيقة لما ما بيتفهمني عربي آخر لأن أنا شايف نصر الله ونتيناهو مثل بعض، ما حدا فيهم بيهمه الإنسان بهالبلاد….. شو عملت اسرائيل وما عملوا حزب الله فينا بسوريا؟ ما هجر ناس، ما اعتقل ناس؟ ما قتل وقصف مدنيين؟ ما غير بنية ديمغرافية لمناطق وحرم أهلها من بيوتهم.

سنة 2015، خلال عام واحد فقط من حصار حزب الله لأربعين ألف شخص بمضايا، مات 65 شخص منهم بسوء التغذية، أغلبهم أطفال. كانت حبة الرز ما تمر، وما ترك مضايا إلا ما هجر أهلها.

من فترة قرأت تعليق لصديقة عربية على الفيسبوك أن موقف السوريين منبعه طائفي، بجد؟ هو جزب الله جاية على سوريا حامل اتفاقيات جنيف الأربعة والسوريين كان ارتكاسهم طائفي؟ مو كل ما مات عنصر بسوريا يصفوه ورا شهداء كربلاء؟

السوريين بحياتهم ما كانو ضد حق الفلسطينين بأرضهم، وبالدفاع عنها، و لا بحق اللبنانيين يعيشو بسلام، بس حبة حبة علينا، نصر الله مجرم، ومات.

البوصلة فلسطين؟ طيب البوصلة بتقبل تتحالف مع مين قتل السوريين؟ فلسطين بالنسبة لحزب الله غسالة بيغسل فيها الدم يلي على تيابه بحجة المقاومة.

إذا نتيناهو أو بشار الأسد مثلا صار معهم سرطان وماتو و خلصنا منهم، شو منكون منحب السرطان يعني مثلا؟

خايفين على مستقبل المنطقة بدون حزب الله؟ هو حزب الله كان مسمار الأمان يعني؟ أي ناشنا مقاومة وناش بلده من حرب لحرب على بيع شعارات.

ما وقتها؟ طيب بس يكون وقتها خبرونا، منأجلها شوي، تكرمو